राष्ट्रिय राजधानी क्षेत्र (भारत)
टेम्पलेट:Infobox settlement राष्ट्रिय राजधानी क्षेत्र (National Capital Region (NCR), एनसीआर) भारत में एगो प्लानिंग इकाई बा जे राष्ट्रिय राजधानी क्षेत्र दिल्ली (एनटीसी) के सेंटर बना के आसपास के अउरी राज्य सभ के इलाका पर बिस्तार लिहले एगो समन्वित (कोऑर्डिनेटेड) बिकास योजना प्रदेश के रूप में अस्थापित कइल गइल बा। एह में दिल्ली (एनटीसी) के अलावा हरियाणा, उत्तर प्रदेश आ राजस्थान के इलाका सामिल बाड़ें।[१]
एनसीआर आ एकरा से संबंधित नेशनल कैपिटल रीजन प्लानिंग बोर्ड के अस्थापना 1985 भइल।[२] ई एक तरह से देहाती-शहरी आबादी के मिलजुल इलाका बा जहाँ शहरीकरण के लेवल 62.6 प्रतिशत[३] के करीब बाटे आ एह इलाका में आवे वाला प्रमुख शहर सभ में फरीदाबाद, गुड़गाँव (गुरुग्राम), नोएडा, गाजियाबाद आ मेरठ नियर शहर बाड़ें। शहरी इलाका आ देहाती आबादी अउरी खेती वाला जमीन के अलावे एह क्षेत्र में पर्यावरण आ इकोलॉजी के हिसाब से संबेदनशील क्षेत्र, संरक्षित क्षेत्र, बन क्षेत्र, आ अभयारण्य सभ भी सामिल बाड़ें।
एकरे हिस्सा के रूप में, दिल्ली बिस्तारित शहरी संकुल (डेल्ही एक्सटेंडेड अर्बन एग्लोमरेशन) द्वारा 2015-16 में कुल $370 बिलियन मूल्य के उत्पादन कइल जे भारत के कुल उत्पादन (जीडीपी-पीपीपी) के लगभग 4% रहल।[४]
