टीवी शो
टेलीविजन शो चाहे टीवी शो (TV show; जेकरा के टीवी प्रोग्राम भा टेलीविजन कार्यक्रम भी कहल जाला) कौनो भी अइसन सामग्री हो सके ला जेकरा के टीवी सेट पर देखलावे खातिर बनावल गइल होखे, सिवाय ब्रेकिंग न्यूज, परचार चाहे ट्रेलर इत्यादि के जिनहना के आमतौर पर मेन शो (मुख्य कार्यक्रम) के बीचा में देखावल जाला। अइसन टीवी शो सभ के प्रसारण ओभर-दि-एयर, सैटेलाइट के माध्यम से चाहे केबिल कनेक्शन के माध्यम से होखे ला आ लोग अपना टीवी पर एह शो भा कार्यक्रम सभ के देख सके ला।
आमतौर पर टीवी शो सभ के प्रसारण के समय पहिले से निश्चित होखे ला। मने की ई कब देखावल जाई ई तय होला आ धारावाहिक शो (जिनहन के अब सीरीज भा टीवी सीरीज कहल जाए लागल बा) हप्ता में क दिन आ कहिया केतना बजे से केतना बजे तक देखावल जाई ई पहिले से घोषित रहे ला। आमतौर पर ई शो एक के बाद एक सीरीज में होखे लें आ हर एक हिस्सा के एपिसोड कहल जाला। अमेरिका आ कनाडा में कई गो एपिसोड वाला शो भा धारावाहिक कार्यक्रम बीचा में ब्रेक ले के फिर से देखावल जाए पर सीजन में बाँटल जालें। हालाँकि, ब्रिटिश अंग्रेजी में सीरीज के मतलब उहे होखे ला जे अमेरिका आ कनाडा के सीजन के मतलब होला। कुछ कम एपिसोड वाला सीरीज सभ के मिनीसीरीज भी कहल जाला।