चाउर

चाउर (अंगरेजी: राइस; हिंदी: चावल) धान के बीया के भूसी हटा देवे के बाद बनल अनाज हवे। बनस्पति बिज्ञान के वर्गीकरण अनुसार ओराइजा जाति के घास के दू गो प्रजाति अफिरकी धान (ओराइजा ग्लैबेरिमा) आ एशियाई धान (ओराइजा सैटाइवा) सभ के बिया से चाउर उपराजल जाला। एकर खेती खाद्यान के रूप में होखे ला आ दुनिया में, उत्पादन के वजन के हिसाब से ई तिसरा नंबर के सभसे ढेर पैदा होखे वाली फसल हवे (चाउर, 741.5 मिलियन टन 2014 में), एकरा ले ढेर गन्ना (1.9 बिलियन टन) आ मक्का (1.0 बिलियन टन) बस दू गो फसल के उत्पादन होला।

सफेद, भूअर आ लाल चाउर के मेरवन; एह में जंगली प्रजाति के कुछ चाउर भी सामिल बाड़ें।

ई आदमिन के मुख्य भोजन के हिस्सा हवे, खासकर के एशिया के लोग के, जबकि मक्का आ गन्ना के पैदावार मनुष्य खातिर सीधे भोजन के अनाज के रूप में ना होला, एही कारण चाउर सभसे प्रमुख अनाज मानल जाला। मनुष्य द्वारा भोजन के रूप में इस्तेमाल होखे वाला ई अनाज, अगर पूरा दुनिया में लोग द्वारा लिहल जाए वाली कैलोरी के हिसाब से देखल जाय, भोजन से मिले वाली कैलोरी के पाँचवाँ हिस्सा पूरा करे ला। चाउर के बिबिध प्रकार के किसिम बाड़ी सऽ आ एह से बने वाला पकवान बहुत प्रकार के बाड़ें।

चाउर के सभसे चलनसार पकवान, जे भारत में इस्तेमाल होला, भात हवे। भात-दाल आ करी-चावल (करी में रसदार तरकारी भा मीट शामिल रहे ला) भारतीय भोजन के सभसे महत्व वाला हिस्सा हवे। फ्राइड राइस, बिरियानी, इडली इत्यादि कई अउरी भारतीय भोजन सभ चाउर से बने लें।