सीजन
सीजन (हिंदी/संस्कृत: ऋतु) मौसम में होखे वाला बदलाव की आधार पर साल क बिभाजन होला। कौनों जगह की मौसम होखे वाला बदलाव जवन हर साल, साल की अलग-अलग हिस्सा में, एगो निश्चित क्रम में होला ओही की आधार पर एक बरिस के अलग-अलग सीजन में बाँट दिहल जाला। भारत में अधिकतर हिस्सा में तीन गो मुख्य सीजन होला गर्मी, जाड़ा आ बरसात।
पुरान भारतीय हिसाब से इहाँ साल के छह गो ऋतु में बाँटल जाला - बसंत, ग्रीष्म, वर्षा, शरद, हेमंत आ शिषिर (या शीत)। बाकी ई जगह की भूगोलीय स्थिति पर निर्भर बाटे, बहुत जगह ख़ाली दू गो सीजन होला जाड़ा आ बसंत। जबकि कुछ जगहन पर साल भर एक्के नियर मौसम रहेला आ कौनों सीजन ना पावल जाला।
मौसम में सीजन की अनुसार बदलाव क मुख्य कारण पृथ्वी क अपनी धुरी पर झुकाव आ साल भर में सुरुज क चक्कर लगावत घरी ए झुकाव की दिशा क सुरुज से संबंध बाटे। साल की जेवना हिस्सा में उत्तरी गोलार्ध सुरुज की ओर झुकल रहेला, इहाँ गर्मी या बसंत क सीजन होला। जब उत्तरी गोलार्ध क झुकाव सुरुज की सम्मुख ना होके, एकरी बिपरीत होला, तब इहाँ जाड़ा क सीजन हो जाला।
एकरी ठीक बिपरीत, जब उत्तरी गोलार्ध में गर्मीं होला तब दक्खिनी गोलार्ध में जाड़ा क सीजन होला।
छह ऋतु[संपादन करीं | स्रोत संपादित करीं]
दक्खिनी एशिया, यानी भारत के आसपास के इलाका में, साल के छह गो ऋतु में बाँटे के परंपरा हवे। एकर एगो आसान बिबरन नीचे दिहल जात बा:
| ऋतु | सुरुआत | अंत | हिंदू महीना | अंगरेजी नाँव से समानता |
|---|---|---|---|---|
| बसंत | बीच-मार्च | बीच-मई | चइत, बइसाख | स्प्रिंग सीजन |
| ग्रीष्म | बीच-मई | बीच-जुलाई | जेठ, अषाढ़ | समर |
| वर्षा | बीच-जुलाई | बीच-सितंबर | सावन, भादो | मानसून |
| शरद | बीच-सितंबर | बीच-नवंबर | कुआर, कातिक | ऑटम |
| हेमंत | बीच-नवंबर | बीच-जनवरी | अगहन, पूस | अर्ली विंटर |
| शिषिर | बीच-जनवरी | बीच-मार्च | माघ, फागुन | लेट विंटर |