गुलाब
टेम्पलेट:Automatic taxobox गुलाब एगो काँटेदार झांगी वाला पौधा हऽ जेमे खुब सुंदर खुश्बुदार फुल फुलाला आ ई फूलवो गुलाब कहाला। बैज्ञानिक हिसाब से ई रोज़ा (Rosa) जाति के सगरी पौधा आ फूल सभ हवें जे रोज़ेसी परिवार में आवे लें। गुलाब के सुंदरता आ सुगंध दुनों खातिर खास महत्व हवे आ एही से ई सजावटी पौधा, गुलदस्ता बनावे, इतर बनावे इत्यादि में इस्तेमाल होला।
गुलाब के लगभग तीन सौ से बेसी प्रजाति बाड़ी सऽ आ हजारन गो ले किसिम सभ बाड़ी सऽ। एकर पौधा झांग नियर हो सके ला, लता नियर हो सके ला आ झाड़ी नियर हो सके ला। एकरे डांठ के बनावट लकड़ी नियर होला आ एह पर काँटा होखे लें। हालाँकि ई काँटा सभ असल में एकरे ऊपरी छाल के बिस्तार होखे लें असल काँटा ना होखे लें। फूल सभ के बनावट आ साइज में बिबिधता देखे के मिले ला। रंग में ई सफ़ेद, गुलाबी, पीयर आ लाल रंग के बिबिध प्रकार के होखे लें। गुलाब के जादेतर प्रजाति सभ एशिया महादीप के मूल पौधा हईं जबकि कुछ प्रजाति यूरोप, उत्तर अमेरिका का उत्तर-पच्छिमी अफिरका के मूल पौधा हईं। एकर बिबिध प्रजाति आ किसिम सभ के आपस में मेल आसानी से हो जाला जेवना कारन एकर बहुत सारा किसिम सजावटी पौधा, इतर इत्यादि खाती बिकसित कइल गइल बाटे।[१] पौधा के ऊँचाई गमला में लागल कुछ इंच के पौधा से ले के लता वाला किसिम सभ में पाँच-सात मीटर के ऊँचाई तक ले हो सके ला।