अंब्रा, पेनंब्रा आ एंटंब्रा
अंब्रा, पेनंब्रा आ एंटंब्रा कौनों छाहीं के तीन गो हिस्सा होलें।[१] जब अँजोर के कौनो स्रोत के सोझा कौनों दूसर अइसन पिंड आ जाला जे अँजोर के रोक के छाहीं बनावे, ओह पिंड के छाहीं के तीन हिस्सा होलें जेह में सबसे अन्हार वाला हिस्सा अंब्रा होला जहाँ तनिको रोशनी ना चहुँपेला[२], दुसरा हिस्सा पेनंब्रा में से देखले पर अँजोर के स्रोत के कुछ हिस्सा भर तोपाइल लउके ला[३], आ छाहीं के सभसे दूर वाला हिस्सा एंटंब्रा होला[४] जहाँ से देखले पर रोशनी के स्रोत के बीचोबीच ओकरा के तोपे वाला पिंड लउके ला बाकी रोशनी के स्रोत पूरा तोपाला ना आ पिंड के चारो ओर गोल चूड़ीदार या अँगूठी के नियर रोशनी लउके ले।[१]
तीनों शब्द अंगरेजी भाषा के हवें आ इनहन के मूल लैटिन भाषा हवे। इनहन के इस्तेमाल आमतौर पर गरहन के ब्याख्या आ बिबरन देवे में होला।