रवि किशन

टेम्पलेट:Infobox politician रवि किशन शुक्ल (जनम:17 जुलाई 1971) जिनके रवि किशन नाँव ढेर परसिद्ध बा, एक ठो भारतीय एक्टर बाने जे मुख्य रूप से भोजपुरी, हिंदी आ कुछ तेलुगु भाषा के सिनेमा सभ में अभिनय कइले बाने। सन् 2006 में रवि किशन, बिग बॉस में हिस्सा लिहलें आ 2012 में झलक दिखला जा में भी प्रतियोगी रहलें। ई गोरखपुर से सांसद बाटेन।

एक्टिंग कैरियर

रवि किशन के पहिली फिलिम पीतांबर (1992) रहल जौन एक ठो हिंदी भाषा के फिलिम रहल आ एह में ऊ मिथुन चक्रवर्ती आ शक्ति कपूर के साथ काम कइलेन। इनके पहिली भोजपुरी फिलिम सइयाँ हमार (2003) रहल जेवना से इनके काफी परसिद्धि मिलल। एकरा पहिले भी ऊ कई गो हिंदी फिलिम सभ में काम कइलेन जेह में हमारा फैसला (1997) काल निर्णय, मुकाम नियर फिलिम रहली।

रवि किशन एकरे बाद भोजपुरी आ हिंदी दुन्नों भाषा की फिलिम में पूछ बढ़ल। इनके कुछ प्रसिद्ध फिलिम सभ में, हिंदी में तेरे नाम (2003), वेलकम टू सज्जनपुर (2008) लक (2009); भोजपुरी में सइयाँ हमार (2003), राम बलराम (2009), देवरा बड़ा सतावेला (2010), मोहल्ला अस्सी (2011), पंडित जी बताईं न बियाह कब होई 2 (2015); आ तेलुगु में रेस गुर्रम (2014) गिनावल जा सके लीं।

टीवी कैरियर

सन् 2006 में रविकिशन बिग बॉस के पहिला सीजन में प्रतियोगी रहलें आ फाइनल में पहुँचले। एकरे अलावा झलक दिखला जा में हिस्सा लिहलें। हाल में एक से बढ़कर एक (जी टीवी कार्यक्रम) आ बाथरूम सिंगर नियर टीवी शो में काम कइलेन। किशन, एनडी टीवी के कार्यक्रम राज पिछले जनम के में होस्ट रहलें।

2013 में ईटीवी के कार्यक्रम सेल्स के बाजीगर में किशन जज रहलें।

राजनीतिक कैरियर

साल 2014 में रवि किशन भारतीय राष्ट्रीय कांग्रेस के टिकट पर जौनपुर से लोक सभा के चुनाव लड़लें। बाद में ऊ भाजपा में शामिल हो गइलेन। 2019 के आम चुनाव खाती भाजपा इनका के गोरखपुर लोकसभा सीट से मैदान में उतारे जा रहल बा।

निजी जीवन

रवि किशन के जनम मुंबई में भइल जहाँ इनके बाबूजी, श्याम नारायण शुक्ल डेयरी के बिजनेस में रहलें। इनके माताजी के नांव जड़ावती देवी हऽ। बाद में, जब रवि दस साल के रहलें इनका पिताजी के बंबई छोड़ के अपना मूल घर केराकत, जौनपुर आवे के पड़ल।

रवि के बियाह प्रीती से भइल बा आ इनके तीन गो बेटी आ एक ठो बेटा बाने।

रवि किशन अपना के भोजपुरी माई के बेटा माने लें।

इहो देखल जाय

• भोजपुरी सिनेमा