लद्दाख

टेम्पलेट:Infobox settlement लद्दाख भारत के सुदूर उत्तरी हिस्सा में एगो इलाका बा आ संघ राज्यक्षेत्र बाटे। ई बड़हन क्षेत्र काश्मीर के हिस्सा हवे जेह के ले के भारत, पाकिस्तान आ चीन में 1947 से बिबाद बाटे। एकर नाँव इहाँ मौजूद हिमालय के एगो परबत श्रेणी लद्दाख श्रेणी के नाँव पर पड़ल हवे हालाँकि ई इलाका एह श्रेणी के आसपास बड़हन क्षेत्र में बिस्तार लिहले बा आ वर्त्तमान में बल्तिस्तान नियर इलाका पाकिस्तान के अधिकार में आ अक्साई चिन इलाका चीन के अधिकार में बाड़ें जे इतिहासी रूप से लद्दाख के हिस्सा रहल हवें। भारत प्रशासित इलाका के 31 अक्टूबर 2019 से संघ राज्यक्षेत्र के दर्जा दिहल गइल एकरे पहिले ई जम्मू-काश्मीर राज्य के हिस्सा रहल।

वर्तमान लद्दाख के बाडर पुरुब में तिब्बत से सटल बा, दक्खिन में लाहुल-स्पीति से आ पच्छिम में जम्मू क्षेत्र, काश्मीर घाटी आ बल्तिस्तान से सटल बा जबकि एकरे उत्तर ओर के बाडर कराकोरम दर्रा के लगे चीन के जिनजियांग प्रांत के दक्खिनी पच्छिमी किनारा से सटल बाटे। ई उत्तर में काराकोरम परबत के सियाचिन ग्लेशियर से ले के मुख्य ग्रेटर हिमालय श्रेणी तक ले दक्खिन में बिस्तार लिहले बाटे।