महामारी
महामारी (pandemic, पैनडेमिक) कौनों रोग बेमारी के कारन फइले वाली मरी (एपिडेमिक) होला जे बहुत बड़ इलाका में बिस्तार ले ले; एक्के साथे कई महादीप सभ के इलाका चाहे फिर पूरा दुनिया भर में मरी फइल जाय। बहुतन रोग-बेमारी अइसनो होलें जिनहना के बिस्तार पूरा दुनिया में भा बहुत बड़ इलाका में लगातार, निश्चित गति से लंबा समय ले या हमेशा बनल रह सकेला जेह में लोग बेमार पड़त रहे आ ठीक होखत जाय बाकी मामिला कंट्रोल से बहरें न होखे तब अइसन बेमारी सभ के एंडेमिक कहल जाला आ ई महामारी में ना गिनल जालीं। आमतौर पर सीजनल बदलाव के कारन होखे वाला जोखाम-बोखार के भी महामारी ना मानल जाला। इतिहास में महामारी फइले के कई उदाहरन देखल मिले लें, छोटकी माता के प्रकोप कई बेर बहुत बड़ इलाका सभ में फइल चुकल बा; 14वीं सदी में फइलल "ब्लैक डेथ" के भी अइसने इतिहासी महामारी में गिनल जाला। हाल के इतिहास के बीतल कुछ महामारी सभ में 1918 के जोखाम महामारी (स्पैनिश फ्लू) आ 2009 के जोखाम महामारी (एच1एन1) गिनावल जा सके लें। वर्तमान में जारी महामारी सभ में एचआइवी/एड्स इन्फेक्शन आ 2019–20 कोरोनावायरस महामारी[१] बा।
संदर्भ
बाहरी कड़ी
- What is a pandemic?, WHO
- The classical definition of a pandemic is not elusive, Heath Kelly, Bulletin of the World Health Organization 2011, WHO