सिकंदरपुर

टेम्पलेट:Infobox settlement सिकंदरपुर भारतीय राज्य उत्तर प्रदेश के बलियाँ जिला में एगो नगर पंचायत आ कस्बा बा। ई अपनहीं नाँव के तहसील के मुख्यालय भी हवे।

सिकंदरपुर के स्थापना लोदी बंस के राजा सिकंदर लोदी कइले रहलें आ उनहीं के नाँव पर एकर नाँव सिकंदर पुर पड़ल। ई गुलाब की खेती खातिर मशहूर हऽ। पुराना समय में ई इतर के ब्यापार के बहुत मशहूर जगह रहल।

जनसंख्या

साल 2011 के भारतीय जनगणना के आँकड़ा अनुसार सिकंदर पुर नगर पंचायत में कुल 15 वार्ड सभ में 23,986 लोग निवास करत रहल जेह में 12,512 मरद 11,474 आ मेहरारू लोग रहल।

एही आँकड़ा के अनुसार, सिकंदरपुर में लिंगानुपात 917 महिला प्रति 1000 पुरुष रहल, जे उत्तर प्रदेश राज्य के औसत लिंगानुपात 912 से थोरिके सा ऊपर रहल। हालाँकि, छोट लइकी-लड़िकन के लिंगानुपात 894 रहल जे राज्य के औसत 902 से तुलना में कम रहल। सिकंदर पुर में साक्षरता के दर 77.08 % रहल जे राज्य के औसत 67.68 % से आगे रहल। इहाँ मरदाना साक्षरता 83.70 % आ जानना साक्षरता 69.88 % रहल।

गुलाब के खेती आ उद्योग

सिकंदरपुर पुराना जमाना से गुलाब के खेती आ गुलाब के अर्क से बने वाला इतर, गुलाब जल आ गुलाब शकरी खातिर मशहूर रहल बा। गुलाब शकरी एक तरह के शरबत बनावे के सामान हवे, चीनी के गोल गोल लड्डू नियर गोला जेह में गुलाब के महक बसल होले आ पानी में डारला पर तुरंते घुल जाला।

हाल के समय में इहाँ के एह उद्योग के स्थिति खराब भइल बा आ सिकंदरपुर के गुलाब उद्योग के खतम होखे के संका बतावल जा रहल बाटे। कुछ मात्रा में अभिन ले इहाँ से बिदेस खातिर गुलाबजल के निर्यात होला जेकरा कारन इहाँ ई रोजगार चल रहल बाटे।