पद्मावत (फिलिम)

पद्मावती हाल में रिलीज होखे वाली, हिंदी भाषा में बनल, एगो भारतीय फिलिम बा जेकर डाइरेक्टर संजय लीला भंसाली बाने। भंसाली आ वायकाम 18 मोशन पिक्चर्स के द्वारा ई फिलिम बनावल जा रहल बाटे। फिलिम में रानी पद्मावती के रूप में मुख्य रोल दीपिका पादुकोण कइले बाड़ी। इनके अलावा फिलिम में मुख्य भूमिका में रणवीर सिंह आ शाहिद कपूर बा लोग।

पहिले ई फिलिम 17 नवंबर 2017 के रिलीज होखे वाला रहल बिबाद के चलते अब एकरा रिलीज के तारिख टार के 1 दिसंबर क दिहल गइल बा।

कहानी

फिलिम के कहानी पद्मावत में बर्णित कथा के आधार पर बा। कथा के मोताबिक पद्मावती मेवाड़ के राजा रावल रतन सिंह के रानी रहली। 1303 में तुरुक राजा अल्लाउद्दीन खिलजी चित्तौड़ के किला पर घेरा डरलें। कथा में बतावल जाला की ऊ रानी पद्मावती के हासिल करे खातिर ई हमला कइले रहलें।

कलाकार

• दीपिका पादुकोण रानी पद्मावती के रोल में
• रणवीर सिंह अल्लाउद्दीन खिलजी के रोल में
• शाहिद कपूर रावल रतन सिंह के रोल में
• संजय दत्त
• अदिति राव हैदरी कमला देवी के रोल में
• डैनी डैनजोप्पा
• जिम सरभ मालिक काफ़ूर के रोल में
• सोनू सूद

बिबाद

साल 2017 के जनवरी महीना में जब एह फिलिम के शूटिंग जयगढ़ के किला में चालू रहल, राजपूत करणी सेना के लोग एह फिलिम के बिरोध में प्रदर्शन कइल आ उनहन लोग के दावा रहे की भंसाली एह में गलत-सलत चीज देखवले बाने। फिलिम के सेट पर उतपात मचावे के कोसिस भी कइल गइल।

6 मार्च 2017 के इहे संगठन के लोग चित्तौड़गढ़ किला में दोबारा उतपात मचावल आ रानी पद्मिनी के महल के शीशा तूर दिहल। भारतीय पुरातत्व बिभाग के अनुसार ई शीसा सभ लगभग चालिस बरिस पुरान रहलें। 15 मार्च 2017 के नामालुम लोगन के झुंड कोल्हापुर में एकरे शूटिंग पर हमला कइल आ सेट पर आगि लगा दिहल जेकरे कारन बहुत सारा पहिनावा के चीज आ गहना जर गइल।

संगीत

फिलिम के गाना सभ के संगीतकार संजय लीला भंसाली बाने आ श्रेया घोषाल के आवाज में गाना के झलक रिलीज हो चुकल बा। घोषाल एह फिलिम के चार गो गाना गवले बाड़ी, एह में दीपिका पादुकोण पर फिल्मावल गइल, राजस्थानी नाच घूमर के साथे गावल गइल गाना भी सामिल बाटे।

बाहरी कड़ी

• टेम्पलेट:IMDb title
• पद्मावती बालीवुड हंगामा पर।