काश्मीर घाटी

काश्मीर घाटी (टेम्पलेट:Lang-en) चाहे कश्मीर वादी भारतीय उपमहादीप के उत्तरी हिस्सा में, महान हिमालय आ पीर पंजाल परबत श्रेणी के बीचा में एगो घाटी बा। हिमालय के महान हिमालय वाली श्रेणी आ निचला हिमालय भा मध्य हिमालय के श्रेणी (जेकर हिस्सा पीर पंजाल हवे) के बीच के अइसन घाटी सभ के "वादी" के नाँव से जानल जाला आ ई एक किसिम के अंतर-परबती (इंटर-मोंटेन) घाटी के उदाहरण हऽ।

काश्मीर घाटी लगभग 135 किलोमीटर लमहर आ 32 किलोमीटर चाकर घाटी हवे जेकरे बीच से झेलम नदी बहे ले। एकरे अलावा एह घाटी में कई गो झील भी बाड़ी स जिनहन में डल झील आ वुलर झील खास परसिद्ध हईं।

काश्मीर घाटी अपनी प्राकृतिक सुंदरता, आरामदायक जलवायु, केसर के खेती, सेब के बागान इत्यादि खाती दुनिया भर में परसिद्ध हवे। एकरे अलावा इहाँ के अर्थब्यवस्था के आधार पर्यटन भी हवे। हालाँकि, भारत-पाकिस्तान के बीच एह इलाका पर अधिकार के बिबाद के चलते ई इलाका के पर्यटन परभावित भइल बा।