कर्मनाशा नदी

कर्मनाशा नदी उत्तर प्रदेश आ बिहार राज्यन के बीच में बहे वाली, गंगा नदी के एगो छोट सहायिका नदी हवे। ई बिहार के कैमूर जिला में से शुरू होखे ले आ ओकरे बाद उत्तर प्रदेश आ बिहार के सीमा बनावे ले। एकरे बायें ओर उत्तर प्रदेश के सोनभद्र, चंदौली आ गाजीपुर जिला पड़े लें जबकि दाहिनी ओर कैमूर आ बक्सर जिला (बिहार के) पड़े लें।

नदी के नाँव एगो पौराणिक कथा के आधार पर पड़ल हवे। कथा के मोताबिक विश्वामित्र ऋषि अपना तपस्या के बल से त्रिशंकु के सदेह स्वरग भेजत रहलें जेकरा के बीचे में रोक दिहल गइल आ ऊ उल्टा लटक गइलें, उनहीं के लार चुए से एह नदी के उत्पत्ती भइल। मानल जाला की एह नदी में नहाए से सगरी अच्छा करम सभ के नाश हो जाला।