उत्तर प्रदेश के भूगोल
उत्तर प्रदेश के भूगोल के प्रमुख चीज एकर बिस्तार, आबादी आ उपजाऊँ जमीन बाटे; रकबा के हिसाब से ई भारत के 4था सभसे बड़हन राज्य हवे आ आबादी के हिसाब से सबसे बड़ राज्य हऽ। अगर भारत के उत्तर आ दक्खिन दू हिस्सा में बाँटल जाय तब ई उत्तर भारत में पड़े ला आ एकर उत्तरी सीमा नेपाल देस के साथे बने ले। भौतिक भूगोल के हिसाब से ई लगभग पूरा तरीका से उत्तर भारत के मैदान में पड़े ला जबकि एकर कुछ उत्तरी हिस्सा हिमालय के तराई वाला हवेआ एकदम दक्खिन में कुछ पठारी हिस्सा पावल जालें। जलवायु आमतौर पर एकही नियर हवे हालाँकि पूरुब से पच्छिम ओर जाए पर बरखा के कमी होखत जाला। पानी के बहाव के बेसिन के हिसाब से ई पूरा तरीका से गंगा बेसिन में पड़े ला आ गंगा, यमुना आ सरजू नदी इहाँ के मुख्य नदी हई। इन्हना के बीचा के हिस्सन के दुआबा कहल जाला।
भाषाई आ सांस्कृतिक रूप से उत्तर परदेस में रुहेल खंड, ब्रज क्षेत्र, बुंदेलखंड, अवध आ पूरबी हिस्सा में भोजपुरी भाषी पूर्वांचल बा; दक्खिनी-पूरबी हिस्सा कुछ कुछ बघेलखंड में रखल जाला। आर्थिक रूप से पच्छिमी उत्तर प्रदेश बेसी बिकसित बाटे जबकि पूरबी उत्तर प्रदेश आ दक्खिनी बुंदेलखंड के हिस्सा पिछड़ा इलाका बाड़ें।