उत्तर भारत

परंपरागत बिभाजन अनुसार भारत के दू हिस्सा में बाँटल जाला - उत्तर भारत या उत्तरी भारत आ दुसरका दक्खिन भारत। हालाँकि, एकर कौनों सटीक परिभाषा नइखे आ अलग-अलग दसा में एकर कुछ अलग अर्थ भी हो सकत बा। पुराना समय में बिंध्याचल परबत के उत्तरी आ दक्खिनी भारत के बीचे के सीमा मानल जाय आ एकरे दक्खिन के इलाका के दक्षिणापथ कहल जाय। बाद में तीन गो हिस्सा में ई बिभाजन हो गइल - हिंदुस्तान (हिमालय आ नर्मदा-बिंध्याचल के बीच), दक्कन (नर्मदा-बिंध्य से तुंगभद्रा-कृष्णा के बीच) आ दक्षिण भारत। कुछ दसा में बंगाल (आ बिहार के भी) उत्तर भारत में ना गिनल जाला। एह प्रकार से सभसे ढेर बिस्तार वाला रूप में उत्तर भारत में राजस्थान, पंजाब, हरियाणा, जम्मू काश्मीर, हिमाचल प्रदेश, उत्तराखंड, आ उत्तर प्रदेश के शामिल कइल जाला। सभसे संकुचित अर्थ में उत्तर भारत में जम्मू काश्मीर, हिमाचल, पंजाब आ हरियाणा के शामिल कइल जाला।