भोजपुरी गाना आ संगीत

भोजपुरी गाना आ संगीत (टेम्पलेट:Lang-en) भारत आ नेपाल के भोजपुरी क्षेत्र आ कुछ अउरी देसन में जहाँ भोजपुरी भाषा बोलल जाले, के संस्कृति के हिस्सा हवें। भोजपुरी संगीत (Bhojpuri music) के उत्पत्ती उत्तर भारतीय हिंदुस्तानी संगीत से बतावल जाला। नाथ पंथ के साहित्य में मौजूद गीत आ कबीरदास के निर्गुन सभ के गायकी से भोजपुरी संगीत में साहित्यिक गीतन के शुरूआत होला आ भोजपुरी लोकगीत (Bhojpuri folk-songs) प्राचीन परंपरा के उपज हवें। पुराना जमाना के भोजपुरी लोकगीत के साथे-साथ आधुनिक आ वर्तमान समय में भोजपुरी गाना (Bhojpuri songs) सभ के ब्यापक चलन बा। जहाँ एक ओर भोजपुरी में संस्कार गीत, मौसमी लोकगीत, आ बिबिध जाति के लोगन के लोकगीत पुराना परंपरा के साथे चल आ रहल बाड़ें, नया ज़माना में भोजपुरी फिलिम सभ के गीत आ भोजपुरी गाना के एल्बम सभ ब्यापक चलन में बाड़ें। वर्तमान समय में भोजपुरी गाना सभ में अश्लीलता एगो प्रमुख बिसेसता आ मुद्दा बा;^[१]^[२] एकरा चलते सस्ता पापुलरिटी हासिल करे वाला लोग भी बा आ एह चलन के बिरोध करे वाला लोग भी आवाज उठावत बा।^[३]^[४]