गंगा छू

गंगा छू एगो छोटहन, बहुत बेसी ऊँचाई पर, कभीकभार बहे वाली नदी भा जलधारा बा जे मानसरोवर झील के पानी बहा के राकस ताल में ले जाले। हिंदू धर्म में बहुत दिन ले ई मान्यता रहल कि गंगा नदी के मूल सोता मानसरोवर से निकसे ला, हालाँकि गंगा छू नदी के खोज के बाद ई साबित भइल कि मानसरोवर के पानी ई नदी बहा के राकस ताल ले ले जाले जबकि राकस ताल खुद एगो बंद झील हवे आ एकर पानी बहरें ना बहे ला। मानल जाला कि कबो राकस ताल सतलज नदी सिस्टम के हिस्सा रहल आ सतलज एही से निकसे।