जी20
टेम्पलेट:Infobox Organization जी20 (जी-20 भा ग्रुप ऑफ ट्वेंटी, बीस के मंडली) दुनिया के बीस गो प्रमुख अर्थब्यवस्था वाली सरकार सभ के आ देसन के केंद्रीय बैंक के गवर्नर लोग के एगो अंतरराष्ट्रीय मंच (फोरम) हवे। जी20 के स्थापना 1999 में भइल। एह में 19 गो देस आ यूरोपियन यूनियन शामिल बा। यूरोपियन यूनियन के प्रतिनिधित्व यूरोपियन कमीशन आ यूरोपियन सेंट्रल बैंक करे लें। सड़मेंड़े देखल जाय तब, जी20 समूह के तहत दुनिया के 85% सकल बैस्विक उत्पाद (GWP), 80% बैस्विक ब्यापार (या, अगर ईयू के अंदरूनी ब्यापार बिलगा दिहल जाय, 75%), आ दुनिया के दू-तिहाई जनसंख्या सामिल बा।[१]
जी20 के मकसद हवे अइसन नीति पर चर्चा कइल जेकरा से अंतरराष्ट्रीय स्तर पर फाइनेंसियल मजबूती आ स्थायित्व के आगे बढ़ावे में मदद मिले। जी20 के सदस्य देसन के मुखिया लोग समय-समय पर आपस में बैठक आ सम्मेलन कइल करे लें जेकर सुरुआत 2008 से भइल, एकरे अलावा वित्त मंत्री लोग आ सेंट्रल बैंक सभ के गवर्नर लोग के बैठक के आयोजन भी होत रहे ला।
साल 2011 में कान में भइल सम्मेलन के बाद से अब एकर सम्मलेन हर साल होला। साल 2017 में ई सम्मलेन जर्मनी के हैम्बर्ग शहर में हो रहल बा।