बेकल उत्साही

टेम्पलेट:Infobox person बेकल उत्साही (1928 – 3 दिसंबर 2016), असल नाँव मो॰ शफ़ी खाँ लोदी, एक ठो कवी, लेखक आ राजीनीतिज्ञ रहलें। उत्साही हिंदी-उर्दू आ अवधी भाषा में कबिताई करें। देसी भाषा के इस्तेमाल इनके कविता आ गीत सभ के बिसेसता मानल जाले।

एकरे अलावा, उत्साही काँग्रेस पार्टी से जुड़ल रहलें आ राज्य सभा के सदस्य भी रहलें। उत्साही के पद्मश्री आ यश भारती सम्मान मिलल रहे।

जीवन

बेकल उत्साही के वास्तविक नाँव शफ़ी खाँ लोदी रहल। इनके बाबूजी के नाँव मो॰ जफ़र खां लोदी आ माताजी के नाँव बिस्मिल्ला रहल। इनकर जनम सन् 1928 में बलरामपुर जिला के गौर रमवापुर में भइल। सुरुआती पढ़ाई अपने गाँव में आ हाईस्कूल के पढ़ाई बलरामपुर के ऍस॰सी॰ कॉलेज से भइल।

1952 के चुनाव परचार में जवाहरलाल नेहरू गोंडा के दौरा पर रहलें आ एही समय इनकर कबिता सुन के इनके उत्साही कहलें।

राजनीतिक जीवन

उत्साही कांग्रेस से जुड़ल रहलें आ इंदिरा गाँधी के करीबी रहलें। राष्ट्रीय अखंडता के खातिर काम करे के कारण इनके राज्य सभा खातिर नामांकित कइल गइल। राष्ट्रीय इंटीग्रेशन कौंसिल के सदस्य भी रहलें, जेकर अध्यक्ष परधानमंत्री होलें।

रचना संसार

बेकल उत्साही के हिंदी आ उर्दू के बीच के दूरी कम करे वाला साहित्यकार मानल जाला। इनके कुछ प्रमुख रचना के नाँव नीचे दिहल बा:

• नगमा-ओ-तरन्नुम (1958)
• बिगुलविजय
• लहके बगिया महके खेत
• सरवरे जाविदाँ (1960)
• अपनी धरती चाँद का दर्पन
• पुरवाईयाँ (1976)
• कोमल मुखड़े बेकल गीत
• शुआमजी (1984)
• चल गोरी दोहापुरम्

अनुबाद

• नेपाल के शाह महेंद्र के गीत संग्रह बसई को लोग के अनुबाद
• फिलिस्तीनी कवी महमूद दरवेश के रचना के अनुबाद

सम्मान

1976 में उत्साही के पद्मश्री सम्मान मिलल। एकरे अलावा इनके उत्तर प्रदेश सरकार द्वारा यश भारती से सम्मानित कइल गइल।