मी टू मूवमेंट

मी टू मूवमेंट (MeToo Movement चाहे #MeToo Movment) एगो बिस्वब्यापी मोहीम भा आंदोलन बा जेह में औरतन द्वारा इंटरनेट पर हैशटैग #MeToo के साथे अपने साथ भइल सेक्सुअल दुरबेहवार के उजागर कइल जा रहल बा। अंतर्राष्ट्रीय स्तर प ई मोहीम साल 2017 में जोर पकरलस आ हाल के दिन में भारत में एह मोहीम के तहत कई लोग अपना साथे भइल खराब बेहवार के खुलासा कइल। ऐक्ट्रेस तनुश्री दत्ता द्वारा नाना पाटेकर पर आरोप लगावल गइल जेकरा से ई मुद्दा मीडिया में आ गइल आ एकरे बाद पत्रकार आ मोदी मंत्रालय में सदस्य एम जे अकबर आ टीवी आ फिलिम एक्टर अलोकनाथ पर अइसन आरोप लगे के बाद ई ब्यापक कभरेज वाला बिसय बन गइल।

एकरे इतिहास के बात कइल जाय तब, एगो अमेरिकी सोशल एक्टीविस्ट तराना बुर्के एह शब्द के इस्तमाल साल 2006 में कइले रहली। बाकी ई पापुलर भइल साल 2017 में जब अमेरिकी ऐक्ट्रेस अलीसा मिलानो (Alyssa Milano) एकर इस्तमाल कइली आ औरतन के एह बात खाती बढ़ावा दिहली कि अपना साथे भइल दुरबेहवार के साझा करे लोग "ताकि लोग के एह समस्या के मात्रा (की अइसन घटना केतना ब्यापक बा) के बारे में बुझा सके"।