उपोष्णकटिबंध
उपोष्णकटिबंध (टेम्पलेट:Lang-en) भूगोलीय आ जलवायु क्षेत्र हवें जे उत्तरी गोलार्ध में उष्णकटिबंध के उत्तर में आ दक्खिनी गोलार्ध में उष्णकटिबंध के दक्खिन में बाड़ें। भूगोलीय रूप से इनहन के उत्तरी आ दक्खिनी उपोष्णकटिबंध कहल जाला आ ई 23°26′11.1″ (चाहे 23.43642°) से 35° अक्षांसन के बीचा में पावल जालें। जइसन कि नाँव से साफ बाटे, ई उष्णकटिबंध के सीमा के ठीक पार वाला इलाका हवें; इनहन के बाद समशीतोष्ण (टेम्परेट) इलाका सुरू हो जाला। भूगोल में जेह अक्षांसी इलाका के घोड़न के अक्षांस कहल जाला उहो बेल्ट एही उपोष्ण कटिबंध में आवे लीं।
उपोष्ण कटिबंध के जलवायु के प्रमुख लच्छन हवे तेज गर्मी आ कुछ हलका जाड़ा जहाँ कभी-काल्ह के बरफ गिरे ले। अधिकतर उपोष्णकटिबंध के दू किसिम के क्षेत्र में बाँटल जाला: नम उपोष्णकटिबंध, जहाँ बरखा गर्मी के महीना सभ में होखे ला, जइसे कि दक्खिन पूरबी चीन आ दक्खिन पूरबी अमेरिका; आ सूखल गर्मी के इलाका चाहे भूमध्यसागरीय जलवायु जहाँ सीजनल बरखा ठंढा महीना सब में होखे ला, उदाहरण खातिर भूमध्य सागरीय बेसिन के इलाका चाहे दक्खिनी कैलिफोर्निया के इलाका।
उपोष्ण कटिबंधी जलवायु कुछ जगह पर उष्णकटिबंध के भीतर भी पावल जा सके ला जहाँ लोकल ऊँचाई बहुत जादे होखे, जइसे की मैक्सिको के पठार आ वियतनाम के पठार।
दुनिया के बिसाल रेगिस्तान सभ के काफी इलाका एही उपोष्ण कटिबंध वाला हिस्सा में पड़े ला जेकर कारन उपोष्णकटिबंधी रिज़ के निर्माण हवे। जे इलाका समुंद्र के किनारे वाला होखे लें ओहिजे उष्णकटिबंधी चक्रवात सभ के चलते भारी बरखा देखेके मिले ला; जबकि अइसन इलाका ठंढा समुंद्र के तीरे पड़े लें ओहिजे (आमतौर पर महादीप सभ के दक्खिनी पच्छिमी हिस्सा में) धुंध, कोहासा, सूखा आ सूखल गर्मी के सीजन देखे के मिले ला। बिबिध किसिम के पाम, रसेदार फल, आम, पिस्ता, लीची, आ एवाकाडो नियर पेड़-पौधा एह क्षेत्रन में उपजावल जालें।