बर्नारडो बर्टोलूची
टेम्पलेट:Infobox person बर्नारडो बर्टोलूची (Bernardo Bertolucci; 16 मार्च 1941 – 26 नवंबर 2018) एगो इतालवी फिल्म निर्देशक आ पटकथा लेखक रहलें। उनकर प्रमुख फिल्मन में शामिल बा द कंफर्मिस्ट, लास्ट टैंगो इन पेरिस, द लास्ट इंपरर, द सेल्टरिंग स्काई, स्टीलिंग ब्यूटी, द ड्रीमर्स अउरी लिटिल बुद्धा। सन् 2011 में फिल्म निर्माण में उनकर योगदान के देखि के कान्स फिल्म समारोह में उनकरा के पाम दी ओर पुरस्कार से सम्मानित कइल गइल। चर्चित पटकथा लेखिका क्लारा पेप्लो उनकर पत्नी हई।[१][२]
जीवन परिचय[संपादन करीं | स्रोत संपादित करीं]
बर्नारडो बर्टोलूची के जनम इटली के एमिलिया रोमाग्ना प्रांत के पारमा शहर में भइल रहे। उनकर पिता एगो कवि, इतिहासकार आ फिल्म समीक्षक रहलन। एगो सुसंस्कृत परिवार में लालन-पालन भइला के असर ई भइल कि बर्टोलूची मात्र 15 बरिस क उमिर में लेखन कार्य शुरू क दिहलें। बर्टोलूची के पिता मशहूर इतालवी फिल्मकार पियरे पाओलो पसोलिनी क पहिलका उपन्यास के प्रकाशन में मदद कइले रहलन जेकरा बदला में पसोलिनी बर्टोलूची के आपन फिल्म अकातोन में आपन वरिष्ठ सहायक निर्देशक के रूप में काम करे के मौका दिहलें।
26 नवंबर 2018 के इटली के रोम शहर में इनके 77 बरिस के उमिर में निधन भ गइल।[३]
फिल्म निर्माण[संपादन करीं | स्रोत संपादित करीं]
बर्टोलूची अपना पिता नियर एगो कवि आ लेखक बनल चाहत रहलें। ऊ रोम विश्वविद्यालय के आधुनिक साहित्य विभाग में दाखिला ले लिहलें लेकिन एही बीच बर्टोलूची के पसोलिनी के फिल्म में बतौर सहायक निर्देशक काम करे के मौका मिल गइल जेकरा बाद बर्टोलूची स्नातक के पढ़ाई बीचे में अधूरा छोड़ दिहलें। बर्टोलूची 1962 में मात्र 22 साल के उमिर में आपन पहिलका फीचर फिल्म के निर्देशन कइलें। सन् 1972 में बर्टोलूची के फिल्म 'द लास्ट टैंगो इन पेरिस' के लेके एगो बड़ विवाद खड़ा हो गइल। ए फिल्म में मर्लेन ब्रांडो आ मारिया शिन्डर प्रमुख भूमिका निभवले रहलन। ए फिल्म के एगोे रेप सीन के लेके बर्टोलूची पर तमाम तरह के आरोप लागल जेकरा बाद मुकदमा में सजा भाी हो गइल।
1976 में बर्टोलूची '1900' नाव से एगो फिल्म के निर्माण कइलन आ भव्य शैली में फिल्म निर्माण के एगो नया शैली के जनम दिहलें। लेकिन बर्टोलूची के असली प्रसिद्धी मिलल फिल्म 'लास्ट इंपरर' से। ए फिल्म में चीन के आखिरी बादशाह 'असिन ग्योरो पुई' के जीवन वृत्तांत फिल्मावल गइल रहे। बर्टोलूची के ए फिल्म खातिर ऑस्कर पुरस्कार मिलल।
सम्मान[संपादन करीं | स्रोत संपादित करीं]
- 1971: सर्वश्रेष्ठ निर्देशन खातिर नेशनल सोसायटी ऑफ फिल्म क्रिटीक अवॉर्ड
- 1973: नास्त्रो दे अर्जेंटो खातिर सर्वश्रेष्ठ निर्देशक क पुरस्कार
- 1987: सर्वश्रेष्ठ निर्देशन खातिर ऑस्कर पुरस्कार
- 1987: सर्वश्रेष्ठ पटकथा खातिर ऑस्कर सम्मान
- 1987: गोल्डन ग्लोेब सम्मान
- 1987: डेविड डी दोन्तेलो सम्मान
- 2007: वेनिस फिल्म समारोह में गोल्डन लॉयन पुरस्कार
- 2011: कान्स फिल्म समारोह में पाम दी ओर सम्मान