सरना
सरना भारत के पूरबी हिस्सा में, छोटा नागपुर इलाका आ आसपास के क्षेत्रन के कुछ आदिवासी लोगन के रीत-रेवाज, बिस्वास, आ आध्यात्मिक अउरी धार्मिक सिस्टम हवे। एकरा माने वाला लोग प्रकृति के चीजन में आत्मा के होखल माने वाला आ (एनिमिज्म) हवे आ कई गो पच्छिमी आ भारतीय समाजशास्त्री लोग सरना के अलग किसिम के धरम कहे ला।[१] एह तरीका से ई रहन-सहन आ बिचार-बेहवार के एगो सिस्टम चाहे पंथ हवे। एकरा माने वाला लोग झारखंड राज्य में एकरा के अलगा से धरम (रेलिजन) घोषित करे खातिर माँग क रहल बा, हालाँकि अभिन ले एह लोगन के हिंदू धरम में गिनल जाला। सरना के माने वाला लोग एकर बिरोध करे ला आ हाल में, नवंबर 2020 में, झारखंड बिधान सभा एह लोगन के माँग पर "सरना धर्म कोड" पास कइलस।[२][३]
सरना के माने वाला आ एकरे हिसाब से रहन-सहन में रहे वाला जनजातीय लोग मुख्य रूप से झारखंड राज्य में बा। एकरे अलावा बिहार, पच्छिम बंगाल आ ओडिशा राज्य में ई एह मत के माने वाले लोगन के काफी संख्या बाटे। सरना एह पुरुबी भारत के कई ठे जनजाति सभ में मानल जाला। एह जनजाति सभ में मुंडा, हो, संथाली आ अउरी कई गो जनजाति सभ के लोग बा जे सरना में बिस्वास रखे ला आ एह तरीका से आपन आध्यात्मिक पूजा-पाठ आ परंपरा के पालन करे ला।